Die Hoërskool Ben Vorster se jaarlikse gholfkompetisie het Vrydag, die 28ste Mei, by die Tzaneen Buiteklub plaasgevind. Hierdie beterbal-kompetisie wat in aangename, matige weer beslis was, het sowat 32 spanne gelok.
Green van Rensburg en Adi Botes was die uiteindelike wenners na hulle met ‘n totaal van 47 punte die dag se spel bo aan die telbord geëindig het. Die pryse vir die tweedeplek het aan Hansie en Tiaan van der Walt behoort. Gert van Zyl en Louis Erasmus was die span in die derdeplek.
Volgens die Hoërskool Ben Vorster word hierdie gewilde gholfgeleentheid jaarliks gehou en die geld wat ingesamel word na afloop van die kompetisie word dan vir projekte by die skool aangewend.
Die Vossies het hul dankbaarheid aan ieder en elk van die borge betuig wat tot die sukses van die geleentheid bygedra het.